Nëna britanike pret rezultatet e testit të ADN-së për djalin e zhdukur 35 vite më parë

Kerry Needham, nëna e vogëlushit britanik Ben Needham, i zhdukur nga ishulli grek Kos më 24 korrik të vitit 1991, nuk ka humbur shpresën se djali i saj mund të jetë gjallë dhe një ditë të kthehet në shtëpi.

Ben ishte vetëm 14 muajsh kur u zhduk gjatë një pushimi me familjen. Ai po luante pranë shtëpisë që gjyshërit e tij po riparonin kur u zhduk pa lënë gjurmë. Kerry, tani 53 vjeçe, jeton në Antalya, Turqi, dhe thotë se një email i ri i dërguar asaj mund të sjellë informacion të rëndësishëm mbi rastin. Një grua i shkroi se i dashuri i saj mund të jetë Ben, i cili do të kishte mbushur 36 vjeç në tetor të vitit të kaluar.

“Mbaj një mendje shumë të hapur,” tha Kerry. “Kur mora atë email, nuk u entuziazmova menjëherë sepse nuk kisha fotografi dhe pak informacion. Gruaja vetëm tha se ka shumë ngjarje që nuk përputhen me të kaluarën e tij.” Kerry e ka dërguar korrespondencën te Policia e South Yorkshire, e cila ka udhëhequr hetimet britanike që nga zhdukja e Ben.

Autoritetet po kryejnë aktualisht një test ADN për një burrë të rritur, i cili besohet të jetë rreth 35–36 vjeç dhe mund të jetë Ben Needham. Mostra po krahasohet me profilin gjenetik të familjes së tij për të konfirmuar nëse ai person është vërtet Ben ose një i afërm i ngushtë i tij. Rezultatet nuk janë publikuar ende.

Çështja e Ben ka qenë e komplikuar dhe e mbushur me spekulime. Kerry beson se djali mund të ketë rënë viktimë e rrjetave të trafikut të fëmijëve, të cilët e kanë shitur për adoptim të paligjshëm, duke e nxjerrë jashtë vendit, ndoshta deri në Shtetet e Bashkuara. Ajo ka hulumtuar gjerësisht lidhjen e zhdukjes së Ben me trafikimin e fëmijëve dhe thekson se fenomeni ishte i përhapur në Greqi midis viteve 1950 dhe 1990.

Gjatë viteve, autoritetet britanike dhe greke kanë kryer kontrolle dhe gërmime në ishull për të gjetur gjurmët e Ben. Në vitin 2012, u paraqit teoria se Ben mund të kishte vdekur aksidentalisht kur një eskavator pranë fermës, i drejtuar nga Konstantinos “Dino” Barkas, e kishte shtypur atë. Një informator anonim pretendoi në 2015 se drejtuesi i eskavatorit kishte pranuar në momentet e fundit të jetës së tij se ishte përgjegjës për aksidentin dhe kishte fshehur trupin e vogëlushit. Megjithatë, edhe pas shumë gërmimeve, nuk është gjetur asnjë provë konkrete që të konfirmojë këtë skenar.

Kerry ka kritikuar gjithashtu mungesën e mbështetjes publike dhe të fondeve për hetimin e rastit të Ben, krahasuar me çështjen e Madeleine McCann, duke theksuar se nuk i është dhënë i njëjti trajtim nga autoritetet britanike dhe ambasada në Athinë.

Megjithatë, ajo vazhdon të ndjekë çdo informacion të ri dhe mbetet në kontakt të vazhdueshëm me policinë britanike, duke shpresuar që një ditë të ketë qasje në dosjet e plota të hetimit në Greqi dhe të zbulojë të vërtetën për fatin e Ben Needham.