‘Netflix’ njeh Kosovën si shtet, peticioni me 37 mijë nënshkrime pati sukses

Një nga platformat më të madha e distribuimit kinematografik në botë, Netflix, ka njohur Kosovën si shtet.

Kjo risi vjen si rezultat i një peticioni online të nënshkruar nga 37 mijë shqiptarë, me kërkesën që Kosova të vendoset në listën e shteteve ku kjo platformë shtrihet.

Lajmin për këtë e bëri të ditur nismëtari i këtij peticioni, Sovran Hoti, përmes një njoftimi në rrjetet e tij sociale.

“Nuk u deshën 200 mijë, me 37 mijë nënshkrime dhe rreth 2 muaj, Netflix e dëgjoi thirrjen tonë”, shkroi Sovran Hoti në “Facebook”.

Peticioni me titull “Add Kosovo as a country in Netflix”, kërkonte sovranitetin e Kosovës në Netflix, duke vendosur kodin telefonik në hyrje të regjistrimit për shqiptarët nga Kosova që duan të kenë akses në kompaninë e madhe të distribuimit kinematografik. Netflix ka shtuar Kosovën në listën e shteteve me kodin telefonik +383 në platformën e tyre.