Ministrat e Jashtëm të vendeve perëndimore, përfshirë sekretarin amerikan të Shtetit Antony Blinken, u përplasën me homologun rus Sergei Lavrov në takimin vjetor të Organizatës për Siguri dhe Bashkëpunim, e mbajtur në Maltë.
Në fjalën e tij, Lavorv akuzoi Perëndimin se po provokon përfshirjen e Rusisë në një konflikt direkt, duke e trajtuar si “armik të përbashkët” dhe paralajmëroi se tensionet mund të përshkallëzohen.
“Rezultati i gjithë kësaj është rimishërimi i Luftës së Ftohtë, por që këtë herë shoqërohet me rrezikun e madh të përshkallëzimit në një fazë të nxehtë”, ka deklaruar Lavrov.
Kjo ishte vizita e parë e kryediplomatit rus në një vend anëtar të BE-së, që prej shkurtit të vitit 2022. Edhe pse është i sanksionuar nga Unioni, atij nuk i ndalohet udhëtimi.
Por nuk ka vonuar përgjigjja e sekretarit amerikan të Shtetit, Antony Blinken, i cili ka denoncuar atë që e ka quajtur “cunami i keqinformimit” nga Rusia, edhe pse Lavrov kishte lënë sallën.
“Homologu ynë është shumë i zoti në përmbytjen e dëgjuesve me një cunami keqinformimi”, ka deklaruar Blinken.
Duke iu referuar deklaratës së Lavrov për një përshkallëzim, shefi i diplomacisë amerikane ka theksuar se atë e shkaktojnë manovrat e Moskës, që ka angazhuar në luftë trupa koreano-veriore, që ka përdorur raketa balistike me rreze të mesme veprimi ndaj Ukrainës dhe që ka ulur nivelin që lejon përdorimin e armëve bërthamore.
Ndërkohë, ministri i Jashtëm ukrainas, Andrii Sybiha deklaroi se vendi i tij po lufton për ekzistencë dhe e quajti ministrin Lavrov një “kriminel lufte”.
LEXONI GJITHASHTU:
- Lavrov: Rusia dhe SHBA në prag të një konflikti të drejtpërdrejtë ushtarak
- Lavrov krahason Kosovën me Ukrainën, kritikon OKB-në
