Nga Vitore Tusha te Tartar Bazaj, kush janë kandidatët për Avokatin e Popullit

Kuvendi ka rihapur procedurën për Avokatin e ri të Popullit. Në përfundim të afatit ligjor janë vetëofruar për të aplikuar për këtë post 14 kandidatë.

Ndër emrat që synojnë postin e mbrojtjes së të drejtave të njeriut është edhe ish kryetarja e gjykatës kushtetuese, Vitore Tusha.

Ish-këshilltari ligjor i Ilir Metës gjatë kohës që ushtronte detyrën e presidentit, Bledar Dervishaj është një tjetër emër në garë.

Listës i bashkohet edhe ish-kryetarja e komisionit qendror të zgjedhjeve, Lefterije Luzi e cila aplikon për herë të dytë për këtë post.

Ish-ministri dhe aktualisht anëtar i Komisionit të Ankimimeve dhe Sanksioneve, Ilir Rusmali është pjesë e listës së kandidatëve.

Vihet re që pjesë e aplikuesve janë edhe dy emra të tjerë nga drejtësia, siç është zv. Kryetari i Këshillit të Lartë të Prokurorisë, Tartar Bazaj dhe avokati Sokol Hazizaj.

Do të jetë komisioni i ligjeve ai që do të zhvillojë seancat dëgjimore e më pas 28 deputetë do të kenë mundësi të mbështesin me firma një prej kandidatëve për ta votuar atë në seancë plenare.

Avokati i Popullit kërkon bashkëpunim mes shumicës dhe pakicës parlamentare. Për të votuar një prej kandidatëve për avokat populli duhet shumicë e cilësuar prej 84 votash.

Do të mbetet për t’u parë nëse do të ketë vullnet politik mes palëve, pasi në dhjetor Partia Socialiste dhe ajo demokratike për shkak të përplasjeve nuk arritën të votonin një prej kandidatëve.

LEXONI GJITHASHTU:

• Mbyllen aplikimet për Avokatin e Popullit, ja kandidatët
• Skandal në azilin e Shkodrës, avokati i popullit: Gjetëm ilaçe të skaduara