Ministrja e Shtetit për Marrëdhëniet me Parlamentin, Elisa Spiropali, ironizoi ditën e djeshme gjatë seancës plenare deputetin Edmon Spaho, duke e cilësuar si revolucionar dhe duke kërkuar një minutë heshtje për mungesën e tij në sallë.
Këtë të premte deputetët e Partisë Demokratike kanë depozituar në Kuvend një kërkesë për përjashtimin e Spiropalit me 10 ditë nga punimet e parlamentit.
Deputetët e PD-së e cilësojnë gjuhën e Spiropalit si fyese dhe që duhet të ndëshkohen nga Komisioni i Etikës dhe Rregullores.
“Një minutë heshtje për Edmond Spahon që ra në Komisionin e Etikës si një revolucionar i vërtetë. Keqardhje që trashëgimia e tij e bilbilfryerjes nuk u trashëgua tek ju. Ai ishte padiskutim më i guximshmi dhe më shumë vlerë se ju së bashku. Ai do jetë në zemrat tona, deri pas 20 ditësh, kur të jetë këtu për revolucionin e radhës. ”, tha ajo.
