Njeriu më i moshuar në botë, murgesha 117-vjeçare nga Brazili që adhuron futbollin

Një murgeshë nga Brazili, e cila adhuron futbollin, besohet të jetë personi më i moshuar në botë, duke arritur gati 117 vjeç dhe duke ia atribuuar jetëgjatësinë e saj besimit të palëkundur katolik.

LongeviQuest, një organizatë që gjurmon super njëqindvjeçarët në mbarë botën, publikoi një deklaratë të shtunën, duke shpallur motër Inah Canabarro-n si njeriun më të moshuar në botë, të vërtetuar përmes të dhënave të hershme të jetës së saj.

Murgesha, e cila tani lëviz me karrocë, u kurorëzua si personi më i moshuar në botë pasi Tomiko Itooka vdiq në Japoni në moshën 116-vjeçare, me 26 dhjetor 2024.

Canabarro lindi më 8 qershor 1908, në një familje të madhe në jug të Brazilit, sipas hulumtuesve të LongeviQuest.

Kur ishte adoleshente, ajo iu përkushtua punës fetare dhe kaloi dy vjet në Montevideo të Uruguait para se të transferohej në Rio de Janeiro dhe përfundimisht të vendosej në shtetin e saj të lindjes, Rio Grande do Sul.

Për ditëlindjen e saj të 110-të, ajo u nderua nga Papa Françesku. Ajo është murgesha e dytë më e moshuar e dokumentuar, pas Lucile Randonit, e cila ishte njeriu më i moshuar në botë deri kur vdiq në vitin 2023 në moshën 118-vjeçare.

Së bashku me përkushtimin ndaj besimit të saj të përjetshëm, ajo është një tifoze e zjarrtë e klubit lokal të futbollit Inter.

LEXONI GJITHASHTU:

• Papa bën thirrje për ndaljen e luftërave në mbarë botën
• Trump merr detyrën më 20 janar, çfarë pritet të ndryshojë në botë