Njohja e Kosovës nga Kenia, reagon Kurti: Mirënjohje presidentit William Samoei Ruto

Kenia ka njohur zyrtarisht shtetin e Kosovës, ndërsa në lidhje me këtë ka reaguar edhe kryeministri Albin Kurti.

Kurti ka shprehur falenderimet e tij të veçanta për presidenten e Kosovës, Vjosa Osmani, dhe ish-presidentin Behgjet Pacolli.

Po ashtu, Kurti shprehu mirënjohjen dhe falënderimet për presidentin e Kenias, duke theksuar se ky ishte një vendim dhe hap historik për afrimin e dy vendeve dhe ndërtimin e marrëdhënieve dypalëshe mes shteteve.

Reagimi i plotë i Kurtit

“Njohja e Republikës së Kosovës nga shteti i Kenias na gëzon të gjithëve dhe është lajm shumë i mirë për Republikën.

Falënderoj presidenten e vendit Vjosa Osmani dhe ish-presidentin Behgjet Pacolli për rolin e tyre, krahas edhe të gjithë atyre që kontribuan në këtë arritje.

Mirënjohje për presidentin e Kenias William Samoei Ruto, i cili mori vendimin dhe hapin historik drejt afrimit të Kenias me Republikën e Kosovës dhe hapjes së rrugës për ndërtimin e marrëdhënieve diplomatike mes dy shteteve tona.

Me vullnet e gatishmëri për bashkëpunim e partneritet të ngushtë në këtë kapitull të parë të marrëdhënieve me Kenian, që urojmë të jetë jetëgjatë, i frytshëm dhe produktiv”, thuhet në reagimin e Albin Kurtit.