Njohja e Palestinës, reagon Netanyahu: Do t’ju përgjigjem pas kthimit tim nga SHBA

Kryeministri Benjamin Netanyahu reagoi me ashpërsi ndaj vendimit të Britanisë, Australisë dhe Kanadasë për njohjen e shtetit palestinez, duke e cilësuar këtë hap si një shpërblim të terrorizmit dhe një kërcënim për sigurinë e Izraelit.

Ai theksoi se nuk do të lejojë krijimin e një shteti palestinez në perëndim të Jordanit dhe konfirmoi qëndrimin e tij të fortë për forcimin e vendbanimeve në Bregun Perëndimor.

“Një shtet palestinez nuk do të krijohet. Përgjigja ndaj përpjekjes së fundit për të imponuar një shtet terrorist në zemër të vendit tonë do të jepet pas kthimit tim nga Shtetet e Bashkuara”.

Kryeministri shtoi se ai ka “një mesazh të qartë për ata udhëheqës që njohin një shtet palestinez pas masakrës së 7 tetorit: ju po i jepni një shpërblim të madh terrorizmit. Dhe unë kam një mesazh tjetër për ju: kjo nuk do të ndodhë. Një shtet palestinez nuk do të krijohet në perëndim të Jordanit”.

Netanyahu gjithashtu pretendoi se për vite me radhë ai ka penguar krijimin e një shteti palestinez, ka forcuar vendbanimet në Bregun Perëndimor – dhe do të vazhdojë ta bëjë këtë.

Reagimi i plotë

“Kam një mesazh të qartë për ata udhëheqës që po njohin një shtet palestinez pas masakrës së tmerrshme të 7 tetorit: Ju po e shpërbleni terrorin me një çmim të madh.

Dhe kam një mesazh tjetër për ju: Kjo nuk do të ndodhë. Nuk do të ketë shtet palestinez në perëndim të lumit Jordan.

Për vite me radhë kam parandaluar krijimin e atij shteti terrorist, kundër një presioni të jashtëzakonshëm, si brenda vendit ashtu edhe nga jashtë.

Ne e kemi bërë këtë me vendosmëri dhe me një aftësi të zgjuar politike. Për më tepër, ne kemi dyfishuar vendbanimet hebraike në Jude dhe Samari dhe do të vazhdojmë në këtë rrugë.

Përgjigja ndaj përpjekjes së fundit për të na imponuar një shtet terrorist në zemër të tokës sonë do të jepet pas kthimit tim nga Shtetet e Bashkuara. Qëndroni në pritje”, thuhet në reagim.

LEXONI GJITHASHTU:

• Njohja e shtetësisë palestineze hap një pyetje tjetër, kush do ta udhëheqë atë?
• “Shpërblim për Hamasin”, Izraeli dënon njohjen e Palestinës nga Britania e Madhe
• Kanadaja, Australia dhe Britania e Madhe njohin zyrtarisht Palestinën si shtet