‘Nuk jam fajtor’, deklaron në Hagë ish-pjesëtari i UÇK-së Salih Mustafa

Ish-pjesëtari i Ushtrisë Çlirimtare të Kosovës, Salih Mustafa ndaj të cilit ka nisur sot gjykimi në Dhomat e Specializuara në Hagë, është deklaruar i pafajshëm.

Gjyqtarja i ka kërkuar Mustafës të konfirmojë deklaratën e tij të dhënë më 28 tetor të vitit 2020 rreth fajësisë apo pafajësisë së tij.

“Nuk jam fajtor për asnjë nga pikat që m’i ngarkon kjo zyre”, ka thënë Mustafa.

Ky është gjykimi i parë që po fillon në Dhomat e Specializuara të Kosovës në Hagë.

Mustafa është i arrestuari i parë nga Specialja dhe që po qëndron në paraburgim prej shtatorit të vitit 2020.

Ish-eprori i UÇK-së akuzohet për trajtim mizor, torturë dhe vrasje të paligjshme, akte këto, të cilat sipas të drejtës ndërkombëtare konsiderohen si krime lufte.

Për krime lufte janë arrestuar edhe Hashim Thaçi, Kadri Veseli, Jakup Krasniqi dhe Rexhep Selimi. Këta të fundit kanë kërkuar lirinë, por kërkesat e tyre janë hedhur poshtë.

Jakup Krasniqi ka mbajtur një nga fjalimet më emocionale në Hagë.

Në nëntor të vitit të kaluar, ai deklaroi para prokurorëve se po bëhet padrejtësi dhe se gjithmonë e ka luftuar vetëm politikisht Serbinë.

Sipas tij Ushtria Çlirimtare e Kosovës nuk ka qenë asnjëherë një ndërmarrje kriminale, por ka luftuar vetëm për liri.

LEXONI GJITHASHTU:

• Serbia shkon në zgjedhje të parakohshme në prill 2022
• Lajçak vizitë 3-ditore në Kosovë, takime me përfaqësues të politikës, biznesit dhe mediave
• Salih Mustafa para Gjykatës Speciale, nuk deklarohet për akuzat për krime lufte