Në ditën e shtatë të seancave dëgjimore për sulmin e 6 janarit në Capitol Hill, janë paraqitur të tjera dëshmi të cilat tregojnë se ish-presidenti Donald Trump ka inkurajuar qëllimisht grupet e ekstremit të djathtë që të marshojnë në Kapitol, në përpjekje për të përmbysur rezultatet e zgjedhjeve të fituara nga Joe Biden.

Dëshmia e re nga ish-këshilltari i Shtëpisë së Bardhë, Eric Herschmann plotësoi detajet e asaj që u përshkrua si një takim i turbullt dhjetori midis Trump dhe këshilltarëve që hodhën teoritë e konspiracionit rreth zgjedhjeve.

“Flynn më bërtiti se isha një dështak  vazhdoi të ngrihej në këmbë dhe nisi të  më bërtiste.  Unë iu ktheva. Ne debatuam”, u shpreh Eric Herschmann, ish-këshilltar i Shtëpisë së Bardhë

Në përpjekje për të krijuar një lidhje midis grupeve ekstremiste Oath Keepers, Proud Boys dhe bashkëpunëtorëve të Donald Trump, anëtarët e grupit u pyetën pse kishin shkuar për të marshuar në Kapitol.

“Ju e njihni presidentin, ai i nervozoi të gjithë. U tha të gjithëve të shkonin poshtë. Kështu që ne ndoqëm ata,” dëshmoi  Stephen Ayres, protestues në Capitol.

“Unë mendoj se ne duhet të heqim dorë nga loja fjalëve dhe duhet të themi  të vërtetat. Dhe ajo që do të ndodhte  ishte një revolucion i armatosur, njerëz vdiqën atë ditë, u shpreh Jason Van Tatenhove, ish zëdhënës i Oath Keepers.

Komiteti i Hetimit  pretendon se ka lidhje të detajuara midis aleatëve kryesorë të Trump dhe ekstremistëve të së djathtës ekstreme . Trump dhe mbështetësit e tij – duke përfshirë shumë republikanë në Kongres, e hedhin poshtë komisionin e 6 janarit duke e cilësuar  si një gjueti politike.

LEXONI GJITHASHTU

• Dëshmi të reja për sulmin e 6 janarit në Capitol Hill
• Një vit pas sulmit në Capitol Hill, vijojnë dy hetime