Drejtori i OBSH për Europën, dr. Hans Kluge ka shfrytëzuar videomesazhin drejtuar kongresit të parë shëndetësor të mbajtur në Tiranë për të kërkuar më shumë vëmendje për fruthin.

Ai vlerësoi  përfshirjen e vaksinës kundër kancerit në qafën e mitrës në kalendarin shqiptar ndërsa apeloi se nuk duhet harruar vaksina e fruthit, që  po kthehet në problem.

“Më lejoni t’ju përgëzoj për nisjen e fushatës mbarëkombëtare për vaksinimin e adoleshentëve ndaj HPV, bashkë me veprimtaritë e tjera të zakonshme të imunizimit të popullatës. Tani na duhet të përqendrojmë vëmendjen te pjesa e mbetur nga vaksinimi i popullatës që mbeti si pasojë e pandemisë së COVID 19. Shtimi i rasteve të fruthit në të gjithë rajonin përbën një shqetësim në rritje”, tha dr. Hans Heri Kluge.

Teksa vlerësoi punën e bërë nga shëndetësia shqiptare, Klugen konfirmoi mbështetjen e OBSH për Shqipërinë në realizimin e Strategjisë Kombëtare për Shëndetin 2021-2030 dhe planin për Shëndetin Mendor deri në vitin 2026.