Vetëm shtatë vende në botë i përmbushën udhëzimet e Organizatës Botërore të Shëndetësisë (OBSH) për cilësinë e ajrit vitin e kaluar për praninë e grimcave toksike të njohura si PM2.5, sipas analizës së fundit të kompanisë zvicerane IQAir.
Kjo do të thotë se pothuajse në çdo vend të botës, ajri është më i ndotur sesa rekomandojnë mjekët, transmeton The Guardian. Australia, Zelanda e Re, Estonia dhe Islanda, si dhe disa shtete më të vogla ishullore, janë ndër vendet e pakta ku sasia e grimcave PM2.5 nuk i kalon 5mikrogram për metër kub.
Vendet më të ndotura janë Çadi, Bangladeshi, Pakistani, Kongo dhe India, ku në vitin 2024 niveli i grimcave toksike në ajër ishte të paktën 10 herë më i lartë se sa parashikojnë udhëzimet e OBSH-së, tregoi studimi.
Ndotja e ajrit është faktori i dytë më i madh i rrezikut që kontribuon në vdekshmëri, menjëherë pas presionit të lartë të gjakut, dhe mjekët thonë se miliona jetë mund të shpëtohen çdo vit nëse ndiqen udhëzimet e OBSH-së.
“Ndotja e ajrit nuk vret menjëherë, kështu që mund të duhen dy deri në tre dekada përpara se të shihen efektet shëndetësore, përveç nëse është shumë ekstreme ”, tha CEO i IQAir, Frank Hames.
Studimi, i cili është kryer për të shtatën vit, zbuloi se ka pasur progres në disa vende, ku përqindja e qyteteve që përmbushin standardet për praninë e grimcave PM 2.5 u rrit nga nëntë për qind në 2023 në 17 për qind vitin e kaluar.
Cilësia e ajrit është përmirësuar disi edhe në Indi, si dhe në Kinë ku nivelet e ndotjes pothuajse u përgjysmuan midis 2013 dhe 2020.
