OKB-ja nis hetime për shtypjen e protestuesve nga regjimi në Iran

Organi më i lartë i Kombeve të Bashkuara për të drejtat e njeriut vendosi të enjten të nisë një mision të ri për hetimin e shtypjes së protestave masive nga regjimi iranian. Këto protesta kanë kapluar Iranin që nga shtatori i këtij viti.

Mocioni u miratua me 25 vota për, 6 kundër dhe 16 abstenime në Këshillin e OKB-së për të Drejtat e Njeriut. Aktivistë dhe disa diplomatë festuan me brohoritje dhe duartrokitje ndërsa rezultati po lexohej nga presidenti i Këshillit, shkruan Radio Evropa e Lirë.

Përfaqësuesja e Teheranit në takimin e Gjenevës, Khadijeh Karimi akuzoi paraprakisht shtetet perëndimore se po përdorinin këtë këshill për ta sulmuar Iranin, gjë që ajo e quajti “të tmerrshme dhe të turpshme”.

Kina u përpoq, por nuk arriti ta kalonte një amendament për këtë mocion, që do të kishte hequr paragrafin kryesor që i referohej hetimit për shtypjen e protestave masive nga Irani.

LEXONI GJITHASHTU:

• Ministri koreano-verior ironizon Sekretarin e OKB-së: “Kukull e SHBA-ve”
• OKB kërkon të shmanget përshkallëzimi i luftës në Ukrainë