OKB paralajmëron: 14,000 foshnje mund të vdesin në Gaza në 48 orë pa ndihmë

Shefi i çështjeve humanitare të OKB-së, Tom Fletcher, ka paralajmëruar se deri në 14,000 foshnje mund të vdesin në Gaza në 48 orët e ardhshme nëse ndihma nuk arrin në kohë.

Në një intervistë për programin “Today” të Radio 4 të BBC-së, Fletcher theksoi urgjencën e situatës, duke përshkruar sasinë e ndihmës që po lejohet të hyjë në Gaza si “krejtësisht të pamjaftueshme” për të përmbushur nevojat e popullsisë.

Ndihma humanitare, përfshirë ushqimin për fëmijë, ka mbërritur në Gaza, por kjo sasi e vogël nuk ka arritur ende te civilët, pasi është ndaluar në anën tjetër të kufirit. Fletcher shpjegoi se vetëm pesë kamionë me ndihma janë lejuar të kalojnë dje, një numër që ai e quajti “pikë uji në oqean” përballë nevojave të mëdha të popullsisë gaziote.

Duke u shprehur për BBC-në, ai theksoi se nëse nuk arrijnë shpejt ndihmat, shumë foshnje mund të vdesin nga uria dhe mungesa e trajtimit mjekësor. OKB-ja ka vlerësuar se ka ende ekipe në terren që po punojnë për të vlerësuar nevojat e njerëzve, por të paktën disa prej këtyre punonjësve humanitarë janë vrarë gjatë përpjekjeve të tyre.

Kërkesat për lehtësim të bllokadës janë bërë gjithnjë e më të forta nga shtetet dhe organizatat ndërkombëtare për të shmangur një katastrofë humanitare të mëtejshme, ndërkohë që presioni ndaj Izraelit për të lejuar më shumë ndihma është rritur.

LEXONI GJITHASHTU:

• Netanyahu reagon ashpër pas kritikave të Britanisë, Francës dhe Kanadasë
• Sulmet izraelite vranë të paktën 60 njerëz në Gazë në 24 orë