“Operacionet do përshpejtohen”, Erdogan u përgjigjet kritikave për tërmetin

Presidenti turk Recep Tayyip Erdogan ka vizituar të mërkurën zonat e prekura nga tërmetet në jug të Turqisë. Erdogan është shprehur i vetëdijshëm për problemet, por ka nënvizuar se situata po përmirësohet.

Kreu i shtetit ka kritikuar ata që i ka quajtur “provokuesit” pasi të mbijetuarit u ankuan se përgjigjja e qeverisë kishte qenë e ngadaltë.

“Në fillim pati probleme në aeroporte dhe në rrugë, por sot situata është lehtësuar dhe nesër do të jetë edhe më mirë. Shteti ka mobilizuar të gjitha burimet dhe po e bën me rigorozitet detyrën e tij”, tha Erdogan.

Erdogan ka bërë të ditur se çdo familje e prekur nga tërmeti do të marrë një ndihmë financiare prej 10 mijë lirash turke nga qeveria.

“Me vullnetin e Zotit, ne do t’u ofrojmë mbështetjen tonë të gjitha familjeve të prekura”, u shpreh Erdogan.

Sidoqoftë, familjet e dëmtuara nga tërmeti druhen se do të humbin jetën si pasojë e motit të acartë, pasi në zonat e largëta ndihmat shtetërore nuk kanë mbërritur ende.

LEXONI GJITHASHTU:

• Erdogan do të vizitojë zonat e goditura nga tërmeti
• E trishtë! Një person në Siri humb 12 anëtarët e familjes nga tërmeti (VIDEO)