Osmani bisedë me presidentin gjerman: Me rëndësi anëtarësimi i Kosovës në KiE

Presidentja Vjosa Osmani, ka zhvilluar një bisedë telefonike me presidentin gjerman Frank-Walter Steinmeier, për të diskutuar mbi anëtarësimin e Kosovës në Këshillin e Europës.

Lajmin e ka bërë të ditur vetë Osmani përmes një postimi në rrjetin social “X”, ku thotë se gjatë bisedës theksoi rëndësinë për përfundimin e këtij procesi, në mënyrë që qytetarët e Kosovës të përfitojnë sa më shpejtë nga instrumentet e Këshillit.

Ajo shtoi gjithashtu se anëtarësimi i Kosovës në KiE do të ishte vetëm një fitore për të drejtat e njeriut në Kosovë, por edhe një fitore për kontinentin europian.

“Dje fola me presidentin gjerman Frank-Walter Steinmeier për të diskutuar anëtarësimin e Kosovës në @CoE. Theksova rëndësinë kritike për përfundimin me sukses të këtij procesi, për të siguruar që të gjithë qytetarët tanë të përfitojnë sa më shpejt nga instrumentet e Këshillit. Anëtarësimi ynë nuk do të ishte vetëm një fitore për të drejtat e njeriut në Kosovë, por edhe një fitore për kontinentin tonë dhe vlerat mbi të cilat ai qëndron fuqishëm”, ka shkruar Osmani.

LEXONI GJITHASHTU:

• Osmani: Serbia po ndihmon Rusinë të hapë një front të ri kundër Perëndimit
• ‘Gati të japim jetën për Kosovën’- Osmani ndan mesazhin e ushtarëve amerikanë