Paditet penalisht kryeprokurorja e Nju Jorkut, hetoi Trump para se të rizgjidhej

Hetuesit federalë në Shtetet e Bashkuara kanë ngritur një padi penale ndaj kryeprokurores së Nju Jorkut, e cila hetoi Donald Trump përpara se të rizgjidhej në krye të Shtëpisë së Bardhë. Duke reaguar, prokurorja e përgjithshme ka deklaruar se gjithçka është një hakmarrje e presidentit.

Prokurorja e përgjithshme e Nju Jorkut, Letitia James është paditur penalisht nga një juri e madhe për një seri akuzash federale. James, që udhëhoqi hetimin për mashtrim financiar në dëm të Trump në 2023-shin, është paditur për mashtrim bankar në distriktin lindor të Virxhinias në Aleksandri, tregojnë dokumentet e gjykatës.

Prokurorët e akuzojnë kolegen e atyre për mashtrim bankar dhe deklarata të rreme të bëra për një institucion financiar në lidhje me marrjen e një huaje për hipotekën e një shtëpie në Norfolk.

Duke reaguar, James akuzoi presidentin Trump, i cili publikisht u bëri presion hetuesve të ngrinin akuza federale ndaj saj, për kthimin në armë të sistemit të drejtësisë.

“Ai po detyron agjencitë federale të zbatimit të ligjit që t’i binden kërkesave të tij, vetëm sepse unë bëra punën time si kryeprokurore e Nju Jorkut”, deklaroi James.

Ajo theksoi se akuzat ndaj saj janë të pabaza dhe se deklaratat e presidentit tregojnë se synimi i vetëm i tij është hakmarrja politike me çdo kusht.

Prokurorët e çështjes deklaruan se ajo provon se askush në Shtetet e Bashkuara nuk është mbi ligjin. “Akuzat që rëndojnë ndaj saj janë të tmerrshme dhe përbëjnë shkelje të besimit publik”, deklaroi një prej hetuesve.