Një 23-vjeçar është vënë në pranga nga Policia e Tiranës, pasi dyshohet se ka kryer 7 vjedhje brenda 48 orësh, tre prej të cilave me thyerje.
I riu me inicialet O. T., është arrestuar në kuadër të operacionit policor të koduar “Repeater”, i finalizuar nga shërbimet e Komisariatit të Policisë Nr. 2. Sipas autoriteteve, ai rezulton të jetë një emër i njohur për drejtësinë, pasi më herët është dënuar për të njëjtën veprimtari kriminale.
Nga hetimet paraprake rezulton se më datë 8 prill 2025, i riu ka kryer vjedhje me thyerje në tre dyqane dhe markete në kryeqytet. Ndërsa një ditë më vonë, më 9 prill, ai ka vjedhur 5 biçikleta, të cilat ndodheshin në banesa ose në rrugë, në pronësi të katër qytetarëve të ndryshëm.
Policia bën me dije se hetimet vijojnë për të zbuluar nëse i riu është i përfshirë edhe në raste të tjera vjedhjesh të ndodhura së fundmi në Tiranë.
Njoftimi i policise
Finalizohet operacioni policor i koduar “Repeater”, për goditjen e veprimtarisë kriminale të vjedhjes së pronës dhe pasurisë.
Gjatë 48 orëve, kreu 7 vjedhje (3 prej tyre me thyerje), identifikohet, kapet dhe vihet në pranga 23-vjeçari, i dënuar më parë për vjedhje.
Shërbimet e Komisariatit të Policisë Nr. 2, në vijim të punës për goditjen e veprimtarisë kriminale të vjedhjes së pronës dhe pasurisë, bazuar dhe në kallëzimet e disa qytetarëve, për vjedhje në pronat e tyre, gjatë ditëve të fundit, kanë organizuar punën për zbardhjen e tyre, identifikimin dhe kapjen e autorit/ëve.
Si rezultat i një pune profesionale hetimore të kryer bazuar në inteligjencën policore, u finalizua operacioni policor i koduar “Repeater”, si rezultat i të cilit u arrestua shtetasi O. T., 23 vjeç.
Nga veprimet hetimore dyshohet se ky shtetas, më datë 08.04.2025, ka vjedhur me thyerje, në 3 markete/dyqane, dhe më datë 09.04.2025, ka vjedhur në banesa ose në rrugë, 5 biçikleta, në pronësi të 4 shtetasve.
Vijojnë hetimet për zbardhjen e vjedhjeve të tjera që mund të jenë kryer nga ky shtetas.
Materialet procedurale iu referuan Prokurorisë së Tiranës, për veprime të mëtejshme.