Para bisedimeve për paqe Rusia lëshon 154 dronë mbi Ukrainë, dy viktima

Të paktën dy persona kanë humbur jetën si pasojë e sulmeve ruse gjatë natës në Ukrainë, sipas Forcave të Armatosura ukrainase.

Autoritetet bëjnë me dije se Rusia ka lëshuar 154 dronë, nga të cilët 148 janë rrëzuar nga mbrojtja ajrore. Megjithatë, disa goditje kanë shkaktuar viktima dhe dëme materiale.

Në qytetin juglindor Zaporizhzhia, një sulm ndaj një banese ka vrarë një çift, ndërsa ka plagosur dy fëmijët e tyre, të moshave 15 dhe 11 vjeç, si dhe katër persona të tjerë. Lajmi u konfirmua nga kreu rajonal, Ivan Fedorov.

Sulmi ndodhi vetëm disa orë përpara zhvillimit të bisedimeve të paqes në Miami mes Shteteve të Bashkuara dhe Ukrainës, sipas mediave shtetërore ukrainase.

Ndërkohë, Presidenti ukrainas Volodymyr Zelenskyy bëri të ditur se një delegacion zyrtar është nisur drejt SHBA-së për të rifilluar bisedimet e ndërmjetësuara nga Uashingtoni me qëllim dhënien fund të luftës. Deri më tani, White House nuk ka konfirmuar zyrtarisht ndonjë takim.