Paralizohen transportet në Gjermani, grevë në aeroporte dhe hekurudha

Rrjeti i transporteve në Gjermani është paralizuar tërësisht ditën e hënë, me vendin që po përjeton grevën më të madhe në dekada.

Stafet në aeroporte, porte, hekurudha, autobusa dhe metro braktisën punën menjëherë pas mesnate për një grevë 24-orëshe.

Dy nga sindikatat më të mëdha të Gjermanisë po kërkojnë paga më të larta për punëtorët, në mënyrë që të mund të përballen me koston e lartë të jetesës.

Ministrja e Brendshme e vendit, Nancy Faeser u shpreh optimiste se një marrëveshje me sindikatat mund të arrihet këtë javë.

“Shumë shërbime publike po përballen me çmimet e larta të energjisë dhe inflacionin e lartë. Ndaj është detyra jonë të arrijmë një marrëveshje të mirë”, tha ministrja për agjencinë e lajmeve “Reuters”.

“Mega greva” e së hënës, sikurse është pagëzuar nga mediat lokale, ka prekur vetëm udhëtarët dhe trenat rajonalë të menaxhuar nga operatori i hekurudhave, “Deutsche Bahn”.

Ndërsa shërbimet lokale të transporteve, përfshirë këtu tramët dhe autobusët, nuk po veprojnë në 7 lande të Gjermanisë.

“Çmimet e naftës dhe ushqimeve janë rritur, po ndjej peshën e tyre në portofol”, tha një protestues në Berlin për agjencinë e lajmeve “AFP”.

Sa u takon aeroporteve, paraliza ka përfshirë edhe ata më të Mynihut dhe Frankfurtit, më të mëdhenjtë në vend.