Parlamenti Evropian dënon kërkesat e Trump për Groenlandën

Parlamenti Evropian ka shprehur “mbështetjen e palëkundur” për Groenlandën dhe Danimarkën, duke dënuar deklaratat e Presidentit amerikan Donald Trump për “të marrë ishullin, në një mënyrë ose në një tjetër”.

Një deklaratë e miratuar të mërkurën nga Konferenca e Presidentëve, që përfshin udhëheqësit e grupeve politike, thekson se deklaratat e administratës Trump përbëjnë një sfidë të hapur ndaj së drejtës ndërkombëtare, parimeve të Kartës së Kombeve të Bashkuara, sovranitetit dhe integritetit territorial të një aleati të NATO-s.

“Deklarata të tilla janë të papranueshme dhe nuk kanë vend në marrëdhëniet midis partnerëve demokratikë,” thuhet në dokument. Parlamenti Europian hedh poshtë “përpjekjet e jashtme për të ndryshuar status quo-në [e Groenlandës]” dhe i bën thirrje Komisionit Evropian dhe shteteve anëtare të BE-së “të ofrojnë mbështetje konkrete dhe të prekshme për Groenlandën dhe Danimarkën”.

Ky qëndrim vjen ndërsa SHBA-të ushtrojnë presion mbi të ardhmen e Groenlandës, me Trump që këmbëngul se pronësia e ishullit duhet t’i transferohet vendit të tij. Ai shkroi në rrjetin social Truth Social: “NATO duhet të na udhëheqë në rrugën e duhur për ta arritur këtë. Nëse nuk e bëjmë ne, do ta bëjnë Rusia ose Kina, dhe kjo nuk do të ndodhë.”

Ndërkohë, Danimarka ka vendosur forca ushtarake për të forcuar praninë e saj në ishull, ndërsa Presidentja e Komisionit të BE-së, Ursula von der Leyen, ka deklaruar se Groenlanda “i përket popullit të saj”.

Miratimi i deklaratës nga Konferenca e Presidentëve tregon se shumica e Parlamentit mbështet këtë qëndrim, edhe nëse jo të gjitha grupet politike janë dakord. Sipas burimeve parlamentare, deklarata u propozua nga një “shumicë e qendrës”, duke përfshirë Partinë Popullore Evropiane, Socialistët dhe Demokratët dhe Renew Europe.

Parlamenti Evropian do të zhvillojë një debat mbi këtë temë gjatë seancës plenare të javës së ardhshme.