Parlamenti Evropian kërkon hapjen e arkivave të ish-Jugosllavisë

Lidhjet ndërmjet krimit të organizuar, politikës dhe bizneseve ekzistonin para shpërbërjes së Jugosllavisë dhe kanë vazhduar që nga fundi i konflikteve të viteve 1990. Eurodeputetët dënojnë mungesën e dukshme të vullnetit të autoriteteve përgjegjëse në rajon për të hapur arkivat e ish-Jugosllavisë dhe që dosjet t’u kthehen qeverive nëse duan.

Kështu u tha në raportin e miratuar një natë më herët nga Parlamenti Evropian.

“Arkivat duhet të hapen. Ky do të jetë një parakusht kryesor për besimin e ndërsjellë në shoqëritë e gjashtë shteteve të Ballkanit Perëndimor”, tha deputeti evropian dhe autori i dokumentit, Lukas Mandl.

Eurodeputetët nënvizojnë gjithashtu se është e rëndësishme që vendet e Ballkanit Perëndimor të bashkëpunojnë dhe të ndajnë inteligjencën me shtetet anëtare dhe partnerët ndërkombëtarë.

Autori i dokumenti, Lukas Mandl, pas miratimit të këtij raporti deklaroi se krimi i organizuar dëmton besimin e qytetarëve ndaj institucioneve të tyre publike.

“Krimi i organizuar dëmton besimin e qytetarëve në institucionet e tyre publike dhe në njëri-tjetrin. Kjo është arsyeja pse është një pengesë e madhe për përpjekjet e shoqërive në Ballkanin Perëndimor për të zhvilluar shtetet dhe ekonomitë e tyre. BE-ja nuk duhet të përdorë krimin e organizuar si justifikim për të vonuar procesin e zgjerimit, por duhet të qëndrojë në krah të njerëzve të Ballkanit Perëndimor në luftën e tyre kundër krimit të organizuar”, tha Mandl.