Partitë në Itali të përçara për emrin e presidentit të ri

Parlamenti i Italisë votoi për të gjashtën ditë radhazi për të zgjedhur presidentin e ri, por partitë nuk arritën të dalin me një emër të përbashkët.

Kërkimi i zëvendësuesi për Sergio Mattarella, mandati 7-vjeçar i të cilit përfundon më 3 shkurt, ka nxjerrë në pah një dështim të lidershipit në blloqet kryesore të qendrës së djathtë dhe të qendrës së majtë.

Krerët e partisë së djathtë, Lega shprehen se donin që për herë të parë  një grua të bëhej presidente.

U bë me dije se të dy grupet mbështesin shefen e shërbimit sekret, Elisabetta Belloni, por lajmi provokoi një reagim të ashpër te partitë e tjera.

Ligjvënësit kanë votuar gjithnjë e më shumë për Mattarella, pavarësisht se ai vetë ka përjashtuar  një mandat të dytë.

Shumë ligjvënës besojnë se riemërimi i tij është mënyra më e mirë për të ruajtur status quo-në dhe për t’i mundësuar qeverisë të përqendrohet në luftën kundër pandemisë COVID-19.

Kryeministri Draghi e ka bërë të qartë se do të dëshironte detyrën e kreut të shtetit, por partitë kryesore deri më tani kanë refuzuar të votojnë emrin e tij, pjesërisht nga frika se ndryshimi i papritur i roleve mund të shkaktojë shpërbërjen e qeverisë së brishtë.

Presidenti është një figurë e fuqishme në Itali, i cili mund të emërojë kryeministra dhe shpesh thirret për të zgjidhur krizat politike.

Ndryshe nga Shtetet e Bashkuara apo Franca, ku krerët e shteteve zgjidhen me votim popullor, në Itali, 1009 parlamentarë dhe përfaqësues rajonalë zgjedhin fituesin në një votim të fshehtë.

LEXONI GJITHASHTU:

Dështon votimi për presidentin në Itali