Partizani në fron për 5 ditë, Tirana rimerr kreun. Kukësi i jashtëzakonshëm

Vetëm 5 ditë ka qëndruar në krye të tabelës së Superligës Shqiptare skuadra e Partizanit, e cila është hasur me një tjetër pengesë. Pas triumfit në derbi, të besuarit e Kolelës nuk shkuan më tepër se një barazim në klasiken përballë Vllaznisë. Dy skuadrat pretendente për të fituar titullin kampion zhvilluan një ndeshje të jashtëzakonshme, ndërkohë ishte Da Silva që zhbllokoi rezultatin dhe shënoi golin e të kuqve.

Në minutat në vijim, shkodranët u kundërpërgjigjën me Bekim Balajn, i cili gjeti golin e tij të parë në këtë rikthim në ‘shtëpinë e tij’. Nga kjo ndalesë përfituan bardheblutë, të cilët likujduan Laçin në ‘Elbasan Arena’, duke fituar me rezultatin 3-2. Skuadra e Shehit shënoi 3 gola që në pjesën e parë, me miqtë që reaguan me dy gola nga Guindo e Ujka.

Në përballjet e tjera, Erzeni fitoi ndaj Egnatias në ndeshjen direkte për Evropën, ku shijakasit fituan 2-1 në shtëpi. Kastrioti mori një tjetër pikë shprese ndaj Teutës në një barazim pa gola, teksa Kukësi i Rraman Hallaçit vijon ecurinë pozitive. Verilindorët regjistruan fitoren e 4-ët në 5 sfida, ndërsa në ndeshjen e ardhshme përballen me Erzenin.

LEXONI GJITHASHTU: 

• PSG me ‘shpatulla pas murit’, Messi vendos kushtet, vendin e titullarit
• VIDEO/ Reperi i njohur ndërron jetë teksa performonte në skenë