Pas kërcënimeve me tarifa 100%, Trump do të takohet me Xi Jinping në Korenë e Jugut

Presidenti i Shteteve të Bashkuara, Donald Trump, do të takohet me homologun e tij kinez, Xi Jinping, në Korenë e Jugut më 30 tetor, në kuadër të një samiti në Azi, ka konfirmuar Shtëpia e Bardhë.

Takimi midis Xi dhe Trump ka qenë në përgatitje prej javësh, por u vu në pikëpyetje ndërsa tensionet midis dy ekonomive më të mëdha në botë vazhduan të rriteshin. Ky do të jetë takimi i parë ballë për ballë i dy udhëheqësve që nga rikthimi i Trump në detyrë.

Trump ka kërcënuar të vendosë një tarifë shtesë prej 100% për mallrat kineze nga nëntori, nëse Kina nuk i heq kufizimet e saj të shtrënguara mbi eksportet e metaleve të rralla.

Në një konferencë për shtyp të enjten, sekretarja e shtypit e Shtëpisë së Bardhë, Karoline Leavitt, konfirmoi takimin midis dy udhëheqësve.

Takimi dypalësh do të zhvillohet në kuadër të Samitit të Bashkëpunimit Ekonomik të Azi-Paqësorit (APEC), i cili do të mbahet nga 31 tetori deri më 1 nëntor në Gyeongju të Koresë së Jugut.

“Do të takohem me Presidentin Xi të Kinës. Kemi planifikuar një takim mjaft të gjatë. Mund të zgjidhim së bashku shumë nga dyshimet dhe pyetjet tona, si dhe asetet tona të jashtëzakonshme,” kishte deklaruar më herët Trump.

“Mendoj se diçka do të funksionojë. Kemi një marrëdhënie shumë të mirë, por kjo do të jetë një marrëdhënie e madhe,” shtoi ai.

Ministri i Tregtisë i Kinës, Wang Wentao, shprehu të premten optimizëm për negociatat e ardhshme me SHBA-në. Ai tha se raundet e kaluara të bisedimeve kanë treguar se “është plotësisht e mundur të gjenden zgjidhje për shqetësimet e njëri-tjetrit” dhe “të promovohet zhvillimi i shëndetshëm dhe i qëndrueshëm i marrëdhënieve ekonomike dhe tregtare Kinë–SHBA.”

Trump pritet gjithashtu të takohet me udhëheqësin e Koresë së Jugut, Lee Jae Myung, gjatë vizitës së tij në këtë vend, dhe të marrë pjesë në një darkë pune për udhëheqësit.

Ky është pjesë i një udhëtimi më të gjerë që Trump po zhvillon në Azi, i cili përfshin edhe një ndalesë në Malajzi të dielën për samitin e Shoqatës së Kombeve të Azisë Juglindore (ASEAN).

Ai do të takohet gjithashtu me udhëheqës nga Malajzia, Koreja e Jugut dhe Japonia — veçanërisht me kryeministren e re japoneze, Sanae Takaichi, sipas Sekretares së Shtypit të Shtëpisë së Bardhë.

Trump dhe Xi kanë folur të paktën tre herë gjatë këtij viti, së fundmi në shtator, kur diskutuan për një marrëveshje mbi operacionet e TikTok në SHBA. Ata u takuan për herë të fundit personalisht në vitin 2019, gjatë mandatit të parë të Trump si president.

Trump ka thënë se komunikimi i drejtpërdrejtë me Xi është mënyra më efektive për të zgjidhur tensionet e vazhdueshme midis SHBA-së dhe Kinës, përfshirë tarifat, mosmarrëveshjet tregtare, trafikimin e fentanilit dhe çështje të tjera.

SHBA-ja dhe Kina i janë përmbajtur një armëpushimi të brishtë tregtar të ndërmjetësuar në maj, duke shmangur tarifat treshifrore që kërcënonin të dy vendet.

Megjithatë, në tetor Kina shtrëngoi kontrollet mbi eksportet e metaleve të rralla, duke bërë që Trump të kërcënojë me një tarifë shtesë prej 100% për importet kineze.

Në një postim në rrjetet sociale, ai kritikoi ashpër Pekinin, duke e akuzuar se “po përpiqet ta mbajë botën peng” dhe se po bëhet “shumë armiqësor.” Trump madje kishte paralajmëruar mundësinë e tërheqjes nga takimi i ardhshëm.

Kina dominon prodhimin e metaleve të rralla dhe disa materialeve të tjera thelbësore, të cilat janë komponentë kryesorë në automjete, telefona inteligjentë dhe shumë pajisje të tjera teknologjike.

LEXONI GJITHASHTU:

• Reklamat kundër tarifave amerikane, Trump ndërpret negociatat tregtare me Kanadanë
• Sulmet amerikane ndaj anijeve të dyshuara me drogë, 3 viktima në Paqësor