Pasionet e njerëzve janë nga më të ndryshmet. 80-vjeçari Gaqo Jordani, ka ngritur një lulishte në oborrin e pallatit ku ai jeton në qytetin e Elbasanit.

Para 15 vitesh nisi të mbillte lulet e para, trëndafilat, e më pas Jordani shtoi shumëllojshmërinë e luleve duke krijuar një ambient të gjelbëruar e çlodhës për komunitetin.

80-vjeçari rrëfen për Euronews Albania si e nisi këtë lulishte, edhe pse profesioni i tij nuk ka lidhje me pasionin për lulet.

“Përditë jam këtu, ngrihem që në mëngjes, marr kafen e pi këtu. Kam krijuar elefantin, kam krijuar Skënderbeun, kalin e Skëndërbeut. Por do formë çdo ditë, duhet t’i rrish me gërshërë se të ikën ajo, prishet forma. Unë kaloj kohën, e mirëmbaj dhe më mirëmban”, tregon i moshuari.

Krijimi i këtij kopshti ka pasur edhe vështirësi, të cilat duket se pasioni për lulet e ka bërë të moshuarin të mos i ndiejë.

Edhe pse në moshë të madhe, pasioni për lulet nuk ia heq dëshirën për të qenë çdo ditë e më shumë vital. Ndërsa duket se të bukurën, lulet dhe gjelbërimin e ka trashëguar nga e ëma.

“Në fakt mamaja ime ishte e dhënë mbas luleve, e mbante shtëpinë me lule, edhe unë me duket kam marrë atë të asaj, s’e kam profesion. Dua gjelbërim, dua lulëzim, dua më të mirën”, shprehet ai.

Jordani thekson se do të kujdeset deri sa të ketë frymë për këtë lulishte e cila është kthyer në një mini-kopsht botanik, ku gjenden më shumë se 100 bimë të ndryshme.