Pasojat e shembjes së digës në Ukrainë, 35 lokalitete ende të përmbytura

Katër ditë nga shkatërrimi i digës në Kakhovka, niveli i ujit në rajonin ukrainas të Khersonit ka nisur të tkurret.

Autoritetet vendore kanë deklaruar se të paktën 35 lokalitete vazhdojnë të jenë të përmbytura, por niveli i ujit ka rënë me gjysmë metër në ditë.

Sipas zyrtarëve, deri të shtunën mbi 6 mijë persona janë evakuuar nga një dyzinë qytetesh të mbuluara nga uji.

Banorëve të komuniteteve të prekura u është bërë thirrje që të qëndrojnë në çatitë e banesave derisa të mbërrijnë skuadrat e shpëtimit, ose që niveli i ujit të ulet më tej. Por edhe në një rast të tillë, atyre u duhet t’u shpëtojnë bombave ruse.

Zyra humanitare e OKB-së në Kiev e ka cilësuar nivelin e vuajtjes së personave të prekur si “të patolerueshëm” dhe ka nisur shpërndarjen e ndihmave.

Ndërkohë, presidenti rus Vladimir Putin ka urdhëruar ngritjen e një komisioni për të luftuar pasojat e përmbytjeve.