PDK kërkon presidentin, Hoxhaj: Nuk do ta votojmë Ramush Haradinajn

Ushtruesi i detyrës së kryetarit të PDK-së, Enver Hoxhaj, ka thënë në emisionin Pressing se kandidati për presidenti të Kosovës duhet t’i takojë PDK-së.

Do të ishte absurde, ka deklaruar Hoxhaj që ne të votojmë një kandidat të partnerëve të koalicionit, kur një herë e kemi bërë Ramush Haradinajn kryeministër e një herë Isa Mustafën.

Enver Hoxhaj tha se nuk do ta votojnë Ramush Haradinaj për president, por do të kenë një kandidaturë të dalë nga partia e tyre.

Lideri i Aleancës për Ardhmërinë e Kosovës, Ramush Haradinaj ka qenë për vizitë tek zyrat e Partisë Demokratike të Kosovës, ku u prit nga kryetari në detyrë, Enver Hoxhaj.

Në takimin e tyre është diskutuar rreth situatës së krijuar nga Gjykata Speciale.

Haradinaj ka shprehur mbështetjen e tij për ish-krerët e Ushtrisë Çlirimtare të Kosovës që po përballen me akuzat, sipas tij, të padrejta për krime të luftës.

Ndërkaq gjatë atij takimi nuk është folur për postin e presidentit sepse lideri i Aleancës për Ardhmërinë e Kosovës tha se nuk ishte momenti i duhur.

“Erdha për mbështetje. Nuk është koha të flasim për presidentin,” – është shprehur Haradinaj.

Ndërkohë që tashmë kemi një deklaratë nga Enver Hoxhaj i cili është shprehur kundër Haradinaj si president i shtetit të Kosovës dhe tha me bindje se nuk do ta votojnë.

Lexoni gjithashtu: 

Posti i presidentit, Ramush Haradinaj: Nuk është koha të flasim për këtë, erdha për mbështetje

Lajçak takon përfaqësuesin e Kosovës dhe Serbisë: Vazhdojnë diskutimet politike në nivel ekspertësh