Pekini shtyp protestat, policia me dorë të hekurt, arrestohet gazetari i BBC

Përgjigjja e autoriteteve kineze ndaj protestuesve kundër kufizimeve të COVID-it është intensifikuar me rritjen e patrullave dhe masave të tjera. Në Shangai, policia u filmua teksa kontrollonte telefonët e njerëzve për pamje të protestave.

Reagimi i regjimit në Pekin ka tërhequr vëmendje ndërkombëtare pasi një gazetar i BBC u arrestua dhe një tjetër u ndalua përkohësisht.

Korrespondenti i televizionit zviceran, Michael Peuker u mor në pyetje pasi bëri një raportim ‘live’ të demonstratave. Por u lirua pak momente më vonë.

Ministria e Jashtme kineze ka fajësuar shtypin e huaj. Një zëdhënës akuzoi gazetarin e BBC Ed Lawrence për shkelje të ligjit kinez të raportimit.

“Gazetari në fjalë nuk u identifikua si gazetar dhe nuk paraqiti kredencialet e shtypit. Forcat e rendit po u bënin thirrje njerëzve në vendngjarje të largoheshin, kush refuzoi të bashkëpunonte u shoqërua”- Zhao Lijian, zëdhënës i qeverisë kineze.

Demonstratat janë përhapur në mbarë vendin prej disa ditësh. Ato nisën kundër masave anti-COVID, por njerëzit kanë ngritur zërin edhe kundër regjimit autoritar.

“Pa dyshim që qeveria do të përdorë masa të ashpra shtypëse dhe është e pamendueshme që ata të përpiqen ta zgjidhin këtë situatë duke u tërhequr, duke ndryshuar politikën e tyre. Kjo nuk është në stilin e presidentit kinez dhe nuk i bën mirë askujt”- shprehet Ho Fung Hung, profesor i politikave ekonomike, Universiteti Johns Hopkins.

Zemërimi ndaj politikës “Zero-COVID” që parashikon përdorim të zgjatur të bllokadave zgjat prej kohësh. Ai shpërtheu në protesta pas një zjarri fatal që u mori jetën 10 personave të izoluar.

LEXONI GJITHASHTU: 

• Term racist, OBSH ndryshon emrin e lisë së majmunit
• Pavarësia, qytetarët mbushin sheshet: Politikanët s’i kanë punët mirë