Përballje titanësh në Angli, Liverpool kërkon përmbysjen ndaj Real Madrid

Një javë pas ndeshjes së parë ku u mposhtën me rezultatin 3-1, Liverpool do të kërkojë përmbysjen thuajse të pamundur kundër Real Madridit, në ndeshjen e dytë çerekfinale të Ligës së Kampionëve.

“Reds”, të mbingarkuar me gabime në ndeshjen e parë, të paktën pjesërisht e korrigjuan situatën, falë golit të Salah, që i mban ende në lojë për kualifikimin.

Shumë dyshime në lidhje me formacionin e Klopp. Në sulm, Diogo Jota është ende favorit ndaj Firmino-s, si pika qendrore e “tridentit” të formuar edhe nga Salah e Mané.

“Është një sezon i çmendur me shumë ndeshje dhe çdo gjë tjetër, por pjesa vendimtare e sezonit është pikërisht tani dhe unë jam 100% i bindur se jemi të përgatitur për një ndeshje të madhe ndaj Real Madridit”, tha Jurgen Klopp, trajner i Liverpool.

Në kampin e “Los Blancos”, Zidane duhet të bëjë pa mbrojtësit Varane dhe Sergio Ramos, të dy pozitivë me Covid-19.

Të gjithë konfirmohen në mesfushë, para “tridentit” të formuar nga Asensio, Benzema dhe Vinicius. Ky i fundit ishte protagonisti i madh i çerekfinales së parë.

Në ndeshjen tjetër çerekfinaliste, Borusia Dortmund do të presë Manchester City-n e Pep Guardioles pas humbjes së ngushtë në përballjen e parë.