Perëndimi i përçarë, BE dhe SHBA nuk gjejnë mbështetje te aleatët për krizën në Gaza

Mbreti Abdullah i Jordanisë ka nisur fushatën e tij për arritjen e armëpushimit në Gaza, duke u ndalur në Bruksel, ku ka zhvilluar bisedime në Komisionin dhe Parlamentin Evropian, si dhe në NATO.

BE po përpiqet të ruajë marrëdhëniet diplomatike me Jordaninë, që konsiderohet një lojtar kyç në luftën Izrael-Hamas; por si bllok, ai nuk ka dalë dot me një zë të vetëm për armëpushim.

Edhe NATO është po ashtu i ndarë, me Turqinë që dënon me forcë ofensivën izraelite në Gaza, në një kohë kur Shtetet e Bashkuara vijojnë mbështetjen për shtetin hebre.

E ndërsa ka shumë vende Perëndimore që mbështesin një ndërprerje humanitare të sulmeve, vizita e Abdullah në Evropë ka pak gjasa të sjellë një konsensus për ndalimin e bombardimeve.

Përçarjet e Perëndimit kanë rënë në sy edhe në takimin e ministrave të G7-s në Japoni. Pas turit joproduktiv në Lindjen e Mesme, sekretari amerikan i Shtetit, Antony Blinken po përpiqet të gjejë mbështetje tek aleatët aziatikë në Tokio. Sidoqoftë, dalja me një qëndrim të përbashkët nuk pritet të ndodhë.

Teksa delegatët janë takuar, protestuesit në kryeqytetin japonez i kanë kërkuar qeverisë që të mbajë një qëndrim më të fortë për armëpushimin.

LEXONI GJITHASHTU:

• Netanjahu: Jemi të hapur për pauza të shkurta humanitare në Gaza
• Propozoi hedhjen e bombës bërthamore në Gaza, Netanjahu shkarkon ministrin