‘Përflitet si pasues i Gledis Nanos’, Ferhati: Drejtuesi i SHÇBA i akuzuar nga PS-ja

Gazetari Eni Ferhati deklaroi se Muhamet Rrumbullaku, një prej kandidatëve të përfolur si pasues i Gledis Nanos në postin e Drejtorit të Përgjithshëm të Policisë, është anatemuar dhe akuzuar nga mazhoranca e sotme, në vitet 2005-2013, kur qeveriste Partia Demokratike.

Në “Euronews Albania”, Ferhati u shpreh se Rrumbullaku është promovuar në gjatë kësaj periudhe nga Partia Demokratike, në nivelin më të lartë.

Ferhati shtoi se emërimi i Rrumbullakut në krye të Agjencisë së Mbikëqyrjes Policore në vitin 2019, u shoqërua me debate dhe diskutime.

“Ndodh që emra të caktuar brenda Policisë së Shtetit, ne i mbajmë mend prej kohësh dhe ende aktualisht janë në nivele drejtuese, thjesht në momente të caktuara spostohen në detyra më pak të rëndësishme, më pas ripromovohen. Pa e paragjykuar zotin Rrumbullaku, një figurë e promovuar në qeverinë e Partisë Demokratike, 2005-2013, në nivelin më të lartë, i anatemuar dhe i akuzuar nga kjo mazhorancë, i rikthyer sërish pas një shkëputje 4 -vjeçare, nga viti 2014-2017, Rrumbullaku ka punuar në sektorin privat.

Rikthehet në vitin 2017 në qeverinë teknike me propozim të PD-së, si këshilltar. Largohet sërish në sektorin privat dhe në vitin 2019 emërohet në Agjencinë e Mbikëqyrjes Policore. Edhe në atë kohë, ka pasur një lloj debati dhe diskutimi në lidhje me emërimin e Rrumbullakut”, theksoi gazetari.

LEXONI GJITHASHTU

• Kush e pason Gledis Nanon? Gazetari tregon 2 kandidatët e mundshëm
• Ngjarjet që rrëzuan Gledis Nanon, 10 muajt në krye të Policisë së Shtetit