“Përhapja e terrorit s’do tolerohet”- Erdogan me dorë të hekurt kundër protestuesve

Qeveria turke ka njoftuar në orët e fundit se mbi 1 mijë e 130 persona janë arrestuar në protestat e ditëve të fundit në mbarë vendin.

Përmes një komunikate, ekzekutivi ka akuzuar personat në fjalë se kanë abuzuar me të drejtën për të protestuar dhe ka paralajmëruar se “përhapja e terrorit në rrugë nuk do të tolerohet”.

Protestat nisën kur kryetari i Bashkisë së Stambollit, Ekrem Imamoglu, kundërshtar i presidentit Recep Tayyip Erdogan, u arrestua të mërkurën e kaluar nën akuzën e korrupsionit.

Konkretisht, ai konsiderohet nga autoritetet përgjegjës për krijimin dhe drejtimin e një organizate kriminale, marrje ryshfeti, zhvatje dhe manipulim të tenderëve.

Vetë Imamoglu ka deklaruar se akuzat janë të motivuara politikisht, pretendim ky i hedhur poshtë nga Erdogan.

Zgjedhjet presidenciale në Turqi nuk do të mbahen para vitit 2028, por gara elektorale ka nisur që tani. Të hënën, Imamoglu u konfirmua nga partia e tij si kandidat për kryetar shteti, pas një votimi simbolik.

Arrestimi i tij ka zemëruar qytetarët turq që ndihen të shtypur nga regjimi i presidentit Erdogan.

Vetë kreu i shtetit ka dënuar mbajtjen e protestave dhe ka akuzuar partinë e rivalit të tij se po cënon paqen dhe po polarizon qëndrimin e popullit turk.

LEXONI GJITHASHTU:

• Turqia ndalon 9 gazetarë gjatë protestave kundër arrestimit të Imamoglut
• Turqia: Siguria e Evropës mund të garantohet vetëm me pjesëmarrjen tonë