Kreu i grupit parlamentar të Partisë Demokratike, Gazment Bardhi, kërkoi nga Kuvendi që Kontrolli i Lartë i shtetit të raportojë mbi punën vjetore në parlament. Bardhi kërkoi nga maxhoranca që ashtu sikurse raportuan instiucionet e tjera të pavarura, edhe KLSH të raportojë brenda këtij sesioni parlamentar.
Bardhi nënvizoi se Kontrolli i Lartë i Shtetit duhet të ftohet të raportojë ditën e premte në seancën plenare. Ai tha se mosthirrja e KLSH-së lidhet me raportet e hartuara për korrupsionin e qeverisë të cilat nuk i pëlqejnë maxhorancës.
“Unë e kuptoj që veprimtaria e KLSH mund të ketë shqetësuar shumë kolegë në këtë sallë për shkak të shkeljeve të dyshuara korruptive. Ka qenë KLSH që ka denoncuar aferën e inceneratorëve, skandalin tek onkologjiku. Kontrolli i Lartë i Shtetit do të duhet të ftohet të raportohet ditën e nesërme në seancën plenare”, tha Bardhi.
Nga ana tjetër, Kryetari i Komisionit të Ekonomisë Eduart Shalsi tha se po vijon përgatitja për projekt-rezolutën e KLGJ, pasi po presin përgjigje në lidhje me skandalin te Onkologjiku.
“Skandali i Onkologjikut, është deklaruar e kallëzim penal, kemi pyetur a ka patur a jo dhe s’kemi ende një përgjigje. Në këtë kontekst, ua thash s’ka nevojë KLSH për avokatinë tuaj. Po vijon përgatitja për projektrezolutën e KLSH”, tha Shalsi.
Nënkryetarja e Ekonomisë, Sorina Koti, nga radhët e PD kërkoi që të mblidhet me urgjencë Komisionin Ekonomisë dhe të raportojë KLSH.
Ajo shtoi se KLSH i ka dhënë përgjigjet dhe s’ka ngelur asnjë përgjigje e pa dhënë, ndaj duhet të raportojë në parlament.
