Përplasje tragjike mes dy automjeteve, 7 persona humbin jetën në Idaho të SHBA-së

Shtatë persona kanë humbur jetën dhe tetë të tjerë janë plagosur në një përplasje të tmerrshme midis një autobusi turistik dhe një kamioni, që ndodhi pranë Parkut Kombëtar Yellowstone në Idahon lindor.

Aksidenti ndodhi të enjten, kur një kamionetë Chevy dhe një furgon që transportonte 14 turistë u përplasën në një autostradë të ngarkuar me trafikun drejt parku.

Policia e shtetit të Idaho-s ka njoftuar se disa nga viktimat janë dërguar me ambulanca ajrore në spital për shkak të lëndimeve të rënda. Të dy automjetet u përfshinë nga flakët, ndërkohë që dëshmitarët raportuan pamje të tmerrshme nga vendi i ngjarjes.

“Tragjikisht, gjashtë persona në furgon dhe shoferi i kamionetës vdiqën në vend”, tha Policia Shtetërore e Idaho-s, duke theksuar se identitetet dhe kombësitë e viktimave ende nuk janë zbuluar. Po ashtu, policia ka njoftuar se hetimet për shkakun e aksidentit vazhdojnë.

Një kalimtar, Roger Merrill, i cili ndodhej duke udhëtuar në atë zonë, ka postuar një foto që tregon flakët dhe tymin që ngriheshin nga automjetet e shkatërruara. Ai ka shtuar se “është një autostradë shumë e rrezikshme sepse të çon në hyrjen kryesore të Parkut Kombëtar Yellowstone, që është jashtëzakonisht e ngarkuar me turistë.”

Ndërkohë, rruga ku ndodhi aksidenti mbeti e mbyllur për më shumë se shtatë orë, ndërsa ekipet e emergjencës trajtuan viktimat dhe pastruan vendin e përplasjes, rreth 25 kilometra larg hyrjes kryesore të Yellowstone.

Yellowstone, parku më i vjetër kombëtar i Shteteve të Bashkuara, është një destinacion turistik i njohur dhe tërheq rreth katër milionë vizitorë çdo vit, shumica e të cilëve vizitojnë parkun gjatë muajve të verës. Pas tragjedisë, autoritetet po bëjnë gjithçka për të siguruar sigurinë e turistëve dhe për të hetuar shkakun e këtij aksidenti të rëndë.

LEXONI GJITHASHTU:

• Trump: SHBA-të mund të përballen me recesion së shpejti
• Gjermania mbron klasifikimin ekstremist të AfD-së pas kritikave të Rubio-s