Përshkallëzimi i tensioneve mes Izraelit dhe Iranit, reagon për herë të parë Rusia

Moska i bëri thirrje Iranit dhe Izraelit të ushtrojnë vetëpërmbajtje mes tensioneve në rritje në Lindjen e Mesme.

Deklaratat u bënë nga zëdhënësi i Kremlinit Dmitry Peskov, i cili kërkoi qetësimin e situatës në mënyrë që të mos arrihet në destabilizimin e rajonit.

“Është shumë e rëndësishme që të gjithë të ushtrojnë vetëpërmbajtje në mënyrë që të mos destabilizohet rajoni, i cili tashmë nuk është stabël”, u tha gazetarëve zëdhënësi i Kremlinit Dmitry Peskov.

Tehrani ka lëshuar kërcënime të reja kundër Izraelit lidhur me një sulm në fillim të këtij muaji ku u vran dy gjeneralë iranianë.

Udhëheqësi suprem i Iranit Ayatollah, Ali Khamenei, e cilësoi sulmin ajror që shkatërroi konsullatën e Iranit në Siri, si një goditje kundër një posti diplomatik që konsiderohet territor iranian. Ai premtoi se Irani do të kundërpërgjigjet dhe hakmerret ndaj Izraelit.

Sulmi vrau 12 persona: shtatë anëtarë të Gardës Revolucionare iraniane, katër sirianë dhe një pjesëtar i milicisë së Hezbollahut. Izraeli nuk e ka pranuar përfshirjen e tij, megjithëse është përgatitur për një përshkallëzim të luftës me Hezbollah që komandohet nga Irani.

LEXONI GJITHASHTU:

• Rusia akuzon forcat speciale britanike se po operojnë në Ukrainë
• Parlamenti ukrainas miraton Ligjin e ri për mobilizim