Përshkallëzohet situata në Iran, revoltë dhe flakë në burgun kryesor të vendit

Një zjarr i fuqishëm ra në 24 orët e fundit në burgun famëkeq të Evinit, në Iran, ku ndodhen të burgosur politikë, gazetarë dhe shtetas të huaj.

Video të publikuara online tregojnë flakët dhe tymin që ngrihet nga vendi i ngjarjes, ndërsa dëgjohen edhe të shtëna dhe shpërthime.

Një zyrtar i cituar nga media shtetërore deklaroi se situata është vënë nën kontroll, por pamjet filmike tregojnë të kundërtën.

Irani është përfshirë prej javësh nga protestat anti-qeveritare.

Ato nisën muajin e kaluar pas vdekjes së 22-vjeçares kurdo-iraniane Mahsa Amini, teksa ndodhej në duart e policisë.

Autoritetet deklaruan se ajo vdiq si pasojë e një ataku kardiak, por familjarët e kundërshtuan këtë pistë duke thënë se vajza u dhunua nga policia.

Korrespondentët e mediave ndërkombëtare raportojnë se nuk dihet nëse revolta në burg ka lidhje me demonstratat e fundit, por një gjë e tillë mund të rezultojë e vërtetë, pasi qindra protestues të arrestuar janë çuar në burgun e Evinit.

LEXONI GJITHASHTU

• Videoja e sulmit seksual ndaj një protestueseje nga policia në Iran shkakton zemërim
• Zgjerohen protestat në Iran, studentëve iu bashkohen edhe punonjësit e rafinerive
• Gjermania paralajmëron sanksione për Iranin pas protestave masive