Pesë të plagosur nga sulmi me thikë në Marsejë, autori vritet nga policia

Një burrë është qëlluar për vdekje nga policia në Marsejë të Francës, pasi plagosi pesë persona me thikë në një incident të rëndë që ndodhi të martën pasdite jashtë një restoranti në zonën Bouches-du-Rhone.

Sipas autoriteteve, një nga viktimat u dërgua në spital në gjendje kritike. Të plagosurit janë sulmuar në vende të ndryshme nga i njëjti autor, i cili mbante dy thika të mëdha dhe një shufër hekuri.

Pamjet e incidentit tregojnë të dyshuarin duke thirrur “Allahu Ekber” përpara se të ecte drejt policisë, e cila e qëlloi pas tentativës së tij për të sulmuar një efektiv.

Burri u godit fillimisht me pistoletë elektroshoku, por më pas u qëllua me armë zjarri ndërsa ndërroi jetë pak pasi mbërriti në spital.

Prokurori publik i Marsejës, Nicolas Bessonne, bëri të ditur se autori ishte një shtetas tunizian me qëndrim të ligjshëm në Francë.

Ai ishte dëbuar më parë nga një hotel në lagjen Belsunce për mospagesë qiraje dhe ishte kthyer më pas për të sulmuar personat që ndodheshin aty.

Sipas autoriteteve, sulmuesi fillimisht goditi me thikë personin që kishte zënë dhomën e tij të vjetër në hotel.

Më pas plagosi menaxherin e hotelit dhe djalin e tij në rrugë. Burri vazhdoi më tej, duke tentuar të godiste klientë në një bistro pranë hotelit dhe më pas kalimtarë të rastit në zonën Cours Belsunce.

Të gjitha viktimat janë plagosur me një thikë të gjatë dhe janë dërguar në spital, ndërsa disa prej tyre ndodhen në gjendje të rëndë.

Mediat franceze raportojnë se autori nuk figuron në regjistrin kombëtar të personave të radikalizuar me rrezik për terrorizëm, por ka qenë i njohur për shërbimet e inteligjencës territoriale.

Ngjarja ka shkaktuar pezullimin e përkohshëm të shërbimeve të transportit publik në zonë, ndërsa vendi i incidentit ndodhet pranë Portit të Vjetër të Marsejës.

Ministri i Brendshëm i Francës, Bruno Retailleau, pritet të vizitojë policinë e Marsejës këtë mbrëmje.

Prokuroria ka hapur hetime për “tentativë vrasjeje me dashje” dhe “tentativë vrasjeje ndaj punonjësve të policisë”.

LEXONI GJITHASHTU:

• Kush qëndron pas thirrjeve virale për mbylljen e Francës më 10 shtator?
• I dehur humbi ekulibrin, francezi rrëzohet aksidentalisht në Butrint