Kush qëndron pas thirrjeve virale për mbylljen e Francës më 10 shtator?

Më 10 shtator, Franca mund të përballet me ndërprerje të mëdha, pasi thirrjet për një mbyllje mbarëkombëtare, që përfshin demonstrata masive dhe bojkot të përgjithshëm të shërbimeve, janë përhapur me shpejtësi.

Ato që fillimisht nisën në rrjete të vogla online, tashmë janë zhvendosur në qendër të debatit politik kombëtar.

Fillimisht, këto thirrje u shfaqën në rrjete si Telegram nga një grup i ri antiqeveritar i quajtur Les Essentiels France, i cili shfaqet si “apolitik”, por lidhet nga disa analistë me qarqe të ekstremit të djathtë dhe teori konspirative.

Ata bënë thirrjen e parë për protesta më 21 maj, duke shkruar:

“Më 10 shtator 2025, Franca do të bjerë në ngërç: s’ka më dorëheqje, s’ka më përçarje”.

Protesta synon të ndalë gjithçka në vend si përgjigje ndaj masave të ashpra të kursimit të njoftuara nga kryeministri François Bayrou në korrik.

Këto përfshijnë heqjen e dy festave zyrtare, ngrirjen e pensioneve dhe përfitimeve sociale – gjë që ka shkaktuar zemërim të madh në opinionin publik.

Mbështetje nga partitë politike dhe rrjetet sociale

Pas shpalljes së masave, lëvizja mori vrull në internet. Një analizë nga Visibrain tregoi një rritje të menjëhershme të postimeve në rrjetet sociale – rreth 30,000 në ditë.

U krijua një faqe zyrtare dhe profile në rrjete sociale, ndërsa mesazhet u përhapën në të gjithë Francën.

Ajo që ngre dyshime është fakti që fushata duket se është nxitur artificialisht nga robotë dhe llogari të rreme, një teknikë e njohur si “astroturfing”.

Këto llogari, shpesh të maskuara si vajza të reja franceze, ndajnë lajme të rreme, përmbajtje të krijuar nga AI dhe mesazhe pro-Kremlinit.

Ekspertët e sigurisë dixhitale nga Projet Fox mendojnë se kjo mund të jetë pjesë e një strategjie për të përçarë shoqërinë franceze, e ndoshta e orkestruar nga fuqi të huaja.

Nga periferia në qendër të politikës

Pavarësisht origjinës së dyshimtë, mbështetja politike për protestën është rritur. Partitë e majta si Franca e Papërkulur (LFI), Ekologët dhe Komunistët e kanë mbështetur publikisht lëvizjen. Edhe disa sindikata të mëdha si CGT janë në favor të bojkotit.

Ndërkohë, disa figura të Partisë Socialiste mbeten të pavendosura.

Me Jean-Luc Mélenchon dhe figura të tjera të njohura që flasin hapur për mbylljen, fushata po kalon nga një lëvizje online në një protestë të organizuar në shkallë të gjerë.

Analistët thonë se tani protesta ka mbështetje nga spektri i gjerë politik – nga e majta radikale te e djathta sovraniste – përfshirë edhe ish-protestues të Jelekëve të Verdhë, të cilët shpesh nuk identifikohen me asnjë parti.

LEXONI GJITHASHTU:

• Franca do të paraqesë plane për sanksione të reja kundër Rusisë
• Votëbesim për qeverinë franceze: Kryeministri propozon shkurtime masive në buxhet