Petrit Vasili: Po veprohet kundër strategjisë së OBSH-së për COVID-19

Zv. Kryetari i LSI-së, Petrit Vasili i cilëson masat e qeverisë për të parandaluar përhapjen e COVID-19 si spontane dhe kaotike. Madje ai e akuzon ekzekutivin se po fsheh të vërtetën me numrin real të të prekurve duke mos kryer testimeve masive.

“Ka vetëm një tregues në ecurinë e pandemive, rastet e reja që shfaqen çdo ditë. Treguesi i vetëm është ulja e rasteve të reja. Sot kemi 25 raste. Jemi larg të vërtetës dhe kjo është shkaktuar nga mungesa e testimeve pasi testimi është e vetmja mundësi suksesi. Në fillim të pandemisë dhe sot që kemi filluar masat e relaksimit, kemi të njëjtat shifra sa i takon të infektuarve”, deklaroi z. Vasili.

“Jam shumë i brengosur që kemi një numër shumë herë më të vogël testimesh se sa Maqedonia. Nuk mund të vendosim një strategji të kundërt nga ajo e OBSH, çdo veprim për të fshehur mungesën e testeve është në dëm të qytetarëve. Nuk kemi asnjë listë të komitetit të ekspertëve. Së pari që komiteti të ekzistojnë duhet të bëhen publike”, shtoi ish-ministri i Shëndetësisë.

Gjithashtu, z. Vasili akuzoi qeverinë se po merr masa që shkojnë përtej gjendjes së fatkeqësisë natyrore. “Qeveria po operon në mënyrë antikushtetuese. Masat janë me gjendjen e jashtëzakonshme që qeveria nuk e ka shpallur. Gjendja e fatkeqësisë natyrore vetë si gjendje nuk i kufizon dot këto liri që qeveria ka ndërmarrë, pasi këto janë masa të gjendjes së jashtëzakonshme. Nuk ka asnjë kufizim të lirive gjendja e fatkeqësisë natyrore, duke luajtur me këtë dyzim, po kërkon që të luajë edhe në javët e ardhshme”, tha ai.

Kërkesën për të shtyrë me dy muaj gjendjen e fatkeqësisë natyrore, ish-deputeti i LSI-së e konsideron të pa argumentuar, pasi nga një anë po merren masa lehtësuese dhe nga një kërkohet shtyrja e afatit për gjendjen e fatkeqësisë natyrore.