Policia e Krujës ka vijuar operacionin e koduar “Formacioni” për goditjen e një grupi kriminal të dyshuar për vjedhje në Fushë Krujë, duke vënë në pranga një nga pjesëtarët e këtij grupi.

Shtetasi me iniciale L. K., 33 vjeç, banues në Kamzë, ishte shpallur në kërkim më datë 02.04.2025, dhe u arrestua pas një operacioni të organizuar në bashkëpunim me Komisariatin e Policisë Nr. 5.

33-vjeçari dyshohet se ka marrë pjesë në vjedhje të dy bizneseve në Fushë Krujë, më 27 dhe 28 mars 2025, së bashku me 6 shtetas të tjerë. Gjatë fazës së parë të operacionit, janë vënë në pranga 4 pjesëtarë të grupit dhe janë zbardhur dy vjedhjet që ata kishin kryer.

Policia vijon hetimet për kapjen e dy shtetasve të tjerë që janë shpallur në kërkim, si dhe për zbardhjen e mundshme të vjedhjeve të tjera që ky grup kriminal mund të ketë kryer.