Plagosi me thikë të miturin, arrestohet 19-vjeçari në Korçë

Policia e Korçës ka arrestuar autorin e plagosjes me thikë të një të mituri mbrëmjen e së mërkurës.

“Në pranga u vu shtetasi A. M., 19 vjeç, banues në fshatin Bulgarec, Korçë, pasi mbrëmjen e djeshme, në fshatin Bulgarec, në rrugë, dyshohet se ka goditur me thikë, një 16-vjeçar, banues në fshatin Bulgarec, për motive të dobëta”, tha policia.

I dëmtuari po merr mjekim në spitalin e Korçës dhe është  jashtë rrezikut për jetën. Në cilësinë e provës materiale u sekuestruan mjeti prerës (thikë) dhe celulari i të arrestuarit.

Burime nga grupi hetimor bëjnë me dije se dy të rinjtë janë konfliktuar fillimisht ditën e martë, ndërsa po luanin me letra në një lokal në fshat, ku debati ka mbetur verbal.

Mbrëmjen e së mërkurës, 18-vjeçari dyshohet se i ka kërkuar 16-vjeçarit të dalë jashtë lokalit për t’u sqaruar, ku situata ka agravuar. Sipas hetimeve paraprake, 19-vjeçari ka nxjerrë një mjet prerës dhe e ka goditur disa herë të miturin.

Ndërhyrja e personave të pranishëm ka parandaluar përshkallëzimin e mëtejshëm të konfliktit.

Hetimet vijojnë për dokumentimin e plotë të ngjarjes dhe sqarimin e motivit të saj.