Plani i Trump, ushtarët ukrainas: I turpshëm, nuk do ta mbështesë askush!

Ushtarët ukrainas që janë në vijën e frontit kanë pasur reagime të ndryshme sa i takon planit amerikan për paqen. Të pyetur nga BBC, disa prej tyre janë shprehur të zemëruar, ndërsa të tjerë të dorëzuar.

Pyetësori i rrjetit informativ britanik u realizua përmes rrjeteve sociale dhe postës elektronike, pas publikimit të detajeve të planit javën e kaluar.

Që prej atëherë, negociatorët amerikanë dhe ata ukrainas kanë punuar për ndryshimin e disa prej propozimeve, për të arritur më pas tek e ashtuquajtura “korniza e paqes”.

Sa i takon planit origjinal, Yaroslav, ushtar që vepron në lindje të Ukrainës, ka thënë: “Është një plan kot… askush nuk do ta mbështesë atë”.

Edhe një mjek ushtarak, i identifikuar si Shtutser, e ka hedhur poshtë. “Është një draft i turpshëm, që nuk e meriton vëmendjen tonë”, ka thënë ai.

Por një ushtar tjetër, i prezantuar me pseudonimin Gjarpri ka pasur një mendim tjetër. “Është koha të bihet dakord për diçka”, ka thënë ai.

Shtetet e Bashkuara i prezantuan propozimet për paqen në një kohë kur Rusia po avancon në fushën e betejës. Përgjatë muajit të kaluar, Ukraina humbi plot 450 kilometra katrorë territor.

Aktualisht, Kievi kontrollon rreth 15 për qind të rajonit të Donbasit, zona lindore e Ukrainës që përfshin Luhanskun dhe Donjeckun, zaptimi i të cilit është një prioritet kyç për Rusinë.

Por plani origjinal amerikan propozon që Ukraina t’ia japë të gjithë rajonin Moskës, përfshirë ato zona që trupat vendase i kanë mbrojtur me sukses në thuajse 4 vjet luftë.

“Le t’i marrin. Nuk ka mbetur më askush në qytetet dhe fshatrat e zonës. Ne nuk po luftojmë për njerëzit, por për tokën dhe po humbasim njerëz”, ka thënë më tej ushtari me pseudonimin Gjarpri.

“Ne mund të mos duam ta dorëzojmë, por nuk do të jemi në gjendje ta mbajmë më tej me forcën tonë ushtarake”, ka thënë një tjetër ushtar, i quajtur Andrii.

Ukraina e mbron rajonin që prej vitit 2014, kur Rusia aneksoi gadishullin e Krimesë dhe mercenarët e Kremlinit disa pjesë të Donbasit.