Plani për kursimin e naftës, nga Agjencia Ndërkombëtare e Energjisë

Lufta në Ukrainë dhe kriza botërore po shtojnë pasiguritë në botë. Një ndër to është edhe furnizimi i tregut me naftë.  

Agjencia Ndërkombëtare e Energjisë lajmëron se bota mund të përballet me shock-un më të madh të mungesës së naftës prej dekadash.

Për t’i paraprirë një krize të tillë të mundshme, kjo Agjenci shpalos një plan kursimi, me 10 pika, që  mund të ulin kërkesën me 2.7 milionë fuçi në ditë, për muajt në vazhdim.

Një ditë e javës pa makina, ndërrimi i tyre me biçikletë, transport publik ose automjet elektrik, janë disa prej pikave të planit që duhet të largojnë shumë individë nga varësia e karburanteve.

Mundësia për të punuar nga shtëpia 3 ditë në javë, reduktimi i shpejtësisë në autostradë dhe zëvendësimi i avionëve me trena të shpejtë janë opsionet e tjera të mundshme në këtë situatë.

Mesazhi i Agjencisë Ndërkombëtare të Energjisë është shpërndarë edhe nga kryeministri Rama, i cili thotë se ai vlen sot edhe për vendin tonë, duke iu përgjigjur në këtë mënyrë skeptikëve dhe protestuesve që kërkojnë ndërhyrje të tjera për çmimet e larta në treg.