‘Po përgatitet sulmi bërthamor’, Zelensky: Bota të reagojë

Presidenti ukrainas Volodymyr Zelensky ka deklaruar se autoritetet në Moskë kanë nisur të përgatisin shoqërinë ruse për një përdorim të mundshëm të armëve bërthamore, edhe pse ai vetë nuk beson se do të arrihet deri në këtë pikë.

“Ata nuk janë gati për ta bërë një gjë të tillë, por kanë filluar të japin sinjale. Ata vetë nuk e dinë nëse do t’i përdorin armët bërthamore apo jo, por mendoj se është e rrezikshme edhe nëse flasim për një gjë të tillë”, ka thënë Zelensky në një intervistë për BBC.

Nga zyra e presidencës në Kiev, kreu i shtetit ka mohuar që të ketë bërë thirrje për sulme kundër Rusisë, duke thënë se deklaratat e tij janë keqinterpretuar.

“Kam thënë se duhet të marrim masa parandaluese, jo sulme”, ka saktësuar Zelensky.

Në javët e fundit, ushtria ukrainase ka rimarrë nën kontroll sipërfaqe të konsiderueshme territori në një kundërofensivë që ka detyruar trupat ruse të braktisin pozicionet e tyre.

Por si përgjigje presidenti rus Vladimir Putin ka aneksuar katër rajone të Ukrainës. Lëvizja, e konsideruar gjerësisht e paligjshme, ka rritur frikën për një përshkallëzim të luftës 7-mujore.

Putin, por edhe zyrtarë të tjerë rusë, kanë sugjeruar se armët bërthamore mund të përdoren për të mbrojtur zonat e aneksuara, edhe pse zyrtarët perëndimorë deklarojnë se nuk ka prova se Moska është përgatitur për një hap të tillë.

LEXONI GJITHASHTU:

• Vladimir Putin merr një traktor për ditëlindjen e tij të 70-të
• Forcat ukrainase përgatiten për sulm potencial nga Bjellorusia