Policia “kap mat” 36-vjeçarin, tentoi ti grabiste me dhunë paratë shitëses në dyqan

Një 36-vjeçar në Shkodër është kapur në flargancë nga policia pasi ishte futur e po tentonte t’i vidhte paratë me dhunë shitëses në një dyqan telefonash.

Shuma e parave prej 32 500 lekësh që ai tentoi të vidhte u sekuestrua nga policia si provë materiale

Njoftimi i policisë:

Mesditën e sotme, punonjësit e Policisë të planëzuara me shërbim në terren, për goditjen e paligjshmërive dhe rritjen e parametrave të sigurisë, kanë konstatuar një shtetas që kishte hyrë në dyqanin e një kompanie telefonike dhe po tentonte t’i merrte me dhunë një shumë parash, punonjëses së dyqanit.

Menjëherë kanë ndërhyrë shërbimet e Patrullës së Përgjithshme dhe shërbimet e Policisë Rrugore që ishin me shërbim në këtë zonë, për të parandaluar vjedhjen dhe për të vënë në pranga autorin.

Si rezultat i veprimeve të shpejta dhe profesionale është kapur në flagrancë dhe është vënë në pranga autori i vjedhjes, shtetasi:

B.K., 36 vjeç, banues në Shkodër.

Gjithashtu u sekuestruan 32 500 lekë të rinj që ky shtetas tentoi t’i merrte në dyqan.

Materialet procedurale do ti kalojnë  Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.