Policia morale në Iran dyshohet se ka rrahur një vajzë, prindërit e mohojnë 

Grupet e të drejtave të njeriut akuzuan sot policinë morale të Iranit për rrahjen e 16-vjeçares Armita Garavand, e cila ngeli në koma, por prindërit pretendojnë se vajza e tyre nuk u sulmua dhe se ngjarja ishte një aksident.

Në videon e postuar në rrjetet sociale shihet vajza e shtrirë, me sa duket pa ndjenja, raporton Guardian.

“Hengaw“, një organizatë e të drejtave të njeriut, pretendon se Garavand pësoi një “sulm të rëndë fizik” nga policia e moralit për mosbindje ndaj rregullit të hixhabit.

Nga ana tjetër, mediat shtetërore pohojnë se vajzës i ka rënë të fikët për shkak të rënies së presionit të gjakut.

Agjencia shtetërore Fars ka publikuar një intervistë me prindërit e vajzës në të cilën shprehen se Armita nuk është sulmuar.

“Ne i kemi kontrolluar të gjitha pamjet. Na është vërtetuar se kjo ngjarje ka qenë aksidentale. Kërkojmë nga njerëzit që të luten për shërimin e fëmijës tonë”, tha babai i vajzës, e cila është ende në koma.

Vitin e kaluar, në shtator, 22-vjeçarja Mahsa Amini vdiq pasi u arrestua për dyshime se kishte shkelur rregullat për veshjen e hixhabit.

Vdekja e Aminit shkaktoi muaj protestash që u kthyen në demonstratat më të mëdha kundër autoriteteve iraniane në vitet e fundit.

LEXONI GJITHASHTU:

• Ermonela Jaho, leksione në TKOB| Sopranoja rikthehet në Tiranë
• Qarkullonte me dokumente të skaduara, gjobitet me 28,000 lekë shoferi në Tiranë