Politikë dhe sport, Parisi i ndarë mes zgjedhjeve dhe Lojërave Olimpike

Kryeqyteti francez po bëhet gati për të mirëpritur atletët dhe vizitorët nga e gjithë bota, por vetëm tre javë përpara Lojërave Olimpike, entuziazmi është i përzierë me ankthin për të ardhmen politike të vendit.

“Ka gjithmonë rrezik. Fushata elektorale ishte e trazuar, ndaj ekziston rreziku që kjo ta prishë pak festën. Prej vitesh Parisi është përgatitur për të pritur Lojërat Olimpike dhe Paraolimpike, ndaj do të ishte fatkeqësi që kjo atmosferë të prishej nga situata e tensionuar politike”, thotë një qytetar.

Rezultati i fuqishëm i arritur nga Bashkimi Kombëtar në raundin e parë ka cenuar humorin e shumë qytetarëve në Paris, qytet që njihet si bastion i krahut të djathtë.

“U gëzuam kur Parisi u zgjodh për Lojërat e vitit 2024, por tani që po i afrohemi askush nuk është i lumtur pasi ka ende shumë punë, biletat janë shumë të shtrenjta dhe shumë francezë nuk do t’i ndjekin dot. Ato nuk janë edhe aq popullore. Sa i takon zgjedhjeve nuk jam i sigurt se ato do të ndryshojnë ndjesinë e francezëve ndaj lojërave. Ato do të ndryshojnë jetët e tyre, pavarësisht se ç’do të ndodhë. Lidhur me lojërat mendoj se tani është shumë vonë. Ato do të nisin pas pak javësh dhe nuk e di nëse zgjedhjet do ndikojnë”, shprehet një tjetër.

Në Paris, ku në raundin e parë Bashkimi Kombëtar mori vetëm 10 për qind të votave krahasuar me 33 për qind në nivel kombëtar, perspektiva që Franca të ketë qeverinë e parë ekstremiste që prej Luftës II Botërore ka bërë që të shkëputet vëmendja nga Lojërat, që në Paris mbahen për herë të parë në 100 vjet.

LEXONI GJITHASHTU:

• 30 mijë policë në gatishmëri për zgjedhjet në Francë, frikë për trazira
• Tërheqje masive e kandidatëve në Francë për të stopuar ekstremin e djathtë