Polonia do dërgojë 60 tanke të modernizuara në Ukrainë

Kryeministri polak, Mateusz Morawiecki, ka thënë se Polonia do të dërgojë dhjetëra tanke në Ukrainë këtë vit.

Në një intervistë për televizionin kanadez, CTV, ai ka thënë se shteti i tij do të dërgojë 60 tanke të avancuara, përveç 14 tankeve të modelit gjerman, Leopard 2.

Varshava, e cila e ka pozicionuar veten si një prej vendeve më mbështetëse ndaj Ukrainës, i ka bërë presion të konsiderueshëm Gjermanisë në javët e fundit që të mundësojë dërgimin e tankeve Leopard 2 në Kiev.

Gjermania është pajtuar për të dërguar vetë këto tanke në Ukrainë, por edhe u ka dhënë dritën e gjelbër shteteve tjera që të veprojnë njëjtë.

“Tani për tani, ne jemi të gatshëm të dërgojmë 60 tanke tona të modernizuara, 30 prej tyre PT-91. Përveç tyre janë edhe 14 tanke Leopard 2, që i kemi në dispozicion”.

PT-91 është tanke luftarake polake, e cila ka nisur të përdoret për herë të parë në vitet 1990.

Presidenti ukrainas, Volodymyr Zekensky, e ka falënderuar Poloninë për dërgimin e më shumë tankeve.

“Së bashku, ne do të fitojmë”, ka shkruar ai në një postim në Twitter.

LEXONI GJITHASHTU:

• Kremlini: SBBA e ka çelësin për t’i dhënë fund luftës në Ukrainë, por s’po e përdorë
• Lufta në Ukrainë, Japonia vendos sanksione të reja ndaj Rusisë