Polonia kërkon arrestimin e gjykatësit që dezertoi në Bjellorusi

Një gjykatës polak që kishte qasje tek sekretet ushtarake, i cili kërkoi azil politik në Bjellorusi, nuk do të ketë më imunitet, sipas vendimit të një gjykate polake.

Dezertimi i gjykatësit Tomasz Szmydt në një shtet aleat të Moskës e ka përqendruar vëmendjen në Varshavë, si një objektiv i rëndësishëm për zbulimin rus. Ligjvënësit e opozitës polake po kërkojnë shpjegime lidhur me mënyrën se si gjykatësi i kërkuar arriti të ngjisë shkallët në nivelet më të larta të drejtësisë polake. Drejtësia polake ka dhënë urdhër për arrestimin e tij nën akuzat për spiunazh dhe ka njoftuar Interpolin, por gjasat për ndalimin e tij janë të vogla.

Dezertori Szmydt i ka mohuar akuzat për spiunazh, duke thënë se ai nuk ka thyer asnjë ligj polak apo evropian.

Agjencia shtetërore e lajmeve e Bjellorusisë njoftoi se Presidenti Alexander Lukashenko ka thënë se do të shqyrtonte kërkesën e zotit Szmydt për azil dhe se i kishte siguruar atij roje personale.

Që nga mbërritja në Bjellorusi, zoti Szmydt ka dhënë intervista për televizionet shtetërore të Rusisë dhe Bjellorusisë, duke thënë se ishte detyruar t’i largohej persekutimit politik në Poloni nga një qeveri që është nën ndikimin e Shteteve të Bashkuara dhe që synon të fillojë një konflikt me Moskën dhe Minskun.

Zyrtarët polakë i kanë hedhur poshtë pretendimet, duke i cilësuar si propagandë absurde që e rrisin peshën e akuzave se ai punonte për zbulimet e huaja. Dy forcat kryesore polake kanë akuzuar njëra-tjetrën për ngritjen misterioze të gjykatësit në postet më të larta të drejtësisë.

Fillimisht, gjykatësi tërhoqi vëmendjen e publikut në Poloni për rolin e tij në një skandal që çoi në dorëheqjen e një zëvendësministri të drejtësisë në vitin 2019.

Ai ishte pjesë e një grupi që akuzohej se kërkonte të diskreditonte gjyqtarët kritikë ndaj reformave në drejtësi të qeverisë së partisë Ligj dhe Drejtësi, duke përhapur thashetheme në media për jetën e tyre private. Në një dokumentar televiziv të vitit 2022 ai zbuloi detaje rreth pjesëmarrjes në atë grup.

LEXONI GJITHASHTU:

• Polonia heton lidhjet e dyshuara të një ish-drejtuesi rafinerie me Hezbollahun
• Polonia, e gatshme të kthejë në Kiev ukrainasit që të shërbejnë në ushtri